راگه‌یاندنی ناوه‌ندی چاک بۆ خۆپێشاندان له له‌نده‌ن‌

راگه‌یاندنی ناوه‌ندی چاک بۆ خۆپێشاندان له له‌نده‌ن‌

2007 10 21 - 12:02

شه‌ممه 27 ی ئۆكتۆبه‌ر 2007 له Downing Street ى له نده ن كوردستانيان
له شكر كيشى توركيا شه رمه زار ده كه ن

بانگه‌وازێک له‌ ناوه‌ندی چاک / به‌ریتانیا
بۆ تێكڕای جه‌ماوه‌ری دڵسۆزی گه‌له‌كه‌مان
بۆ سه‌رجه‌م پارت و ڕێکخراو و داموده‌زگا کوردییه‌کانی به‌ریتانیا

هه‌روه‌ک هه‌موولایه‌ک ئاگادارن، ده‌وڵه‌تی داگیرکه‌ری تورکیا ئاماده‌باشیكردووه‌ بۆ هێرشکردنه‌ سه‌ر باشووری کوردستان و به‌ ده‌یان هه‌زار سه‌ربازیان له‌سه‌ر سنوور مۆڵ داوه. هێرشی ئه‌مجاره‌ی تورکیا بۆ سه‌ر هه‌موو نه‌ته‌وه‌ی کورده،‌ نه‌ک پارتێک و پارچه‌یه‌کی کوردستان. ئێمه‌ له‌ ناوه‌ندی چاک وه‌ک هه‌میشه‌ له‌گه‌ڵ ئازاری نه‌ته‌وه‌که‌مانداین و داکۆکی له‌ مافه‌ ڕه‌واکانمان ده‌که‌ین، له قۆناغی ئێستاماندا به پێویستی ده‌زانین، هه‌موو لایه‌كمان به‌یه‌ك ده‌نگ له‌دژی ئه‌و فراوانخوازیه‌ی توركیا بوه‌ستینه‌وه و خۆپیشاندانێکی گه‌وره‌ی سه‌رتاسه‌ری له‌ له‌نده‌ن رێکده‌خه‌ین، بۆیه‌ داوا له‌ هه‌موو جه‌ماوه‌ری كوردی دانیشتووی به‌ریتانیا و تێكڕای لایه‌ن و پارت ڕێخراو و داموده‌زگا كوردیه‌كان ده‌که‌ین، وه‌کو ئه‌رکێکی نه‌ته‌وه‌یی و ئه‌خلاقی و مرۆڤدۆستانه‌، هیواخوازین به‌ هاوبه‌شی ئه‌نجامی بده‌ین. ئه‌گه‌ر بۆ جارێکیش بێت با هه‌موو بیروباوه‌ڕ و ئایدۆلۆژیایه‌ک بخه‌ینه‌ لاوه‌و به‌ یه‌کده‌نگ و یه‌كڕه‌نگ به‌شداری له‌م خۆپیشاندانه‌دا بکه‌ین.
كات و شوێن:
شه‌ممه 27 ی ئۆكتۆبه‌ر 2007
10 Downing Street
كاتژمێر 11ی سه‌رله‌به‌یانی تا 2 ی دوای نیوه‌ڕۆ
بۆ زانیاری زیاتر ده‌توانن په‌یوه‌ندی به‌م ژماره‌ ته‌له‌فۆن و ئیمه‌یله‌وه بکه‌ن :
ژماره‌ی ته‌لفون:
07709435998 ڕزگار
07815008038 لوقمان
ئیمه‌یل: [e-mail]
ناوه‌ندی چاک / به‌ریتانیا
www.chak.be

بریار دانى ئۆپراسێون بو سەر باشورى کوردستان بریار دانى شەرە لە دژى هەموو نەتەوەى کورد دانى شەرە لە د

بریار دانى ئۆپراسێون بو سەر باشورى کوردستان بریار دانى شەرە لە دژى هەموو نەتەوەى کورد دانى شەرە لە دژى هەموو نەتەوەى کورد

2007 10 21 - 12:10

دەوڵەتانى داگیرکەرى کوردستان بە هەماهەنگى کەوتونەتە پیلانگیرى و جموجوڵێکى سەربازیانە دژ بە نەتەوەى کورد و بە تایبەت حکومەتى باشورى کوردستان و تۆبارانکردنى گوندەکانى سەر سنور کە لە ئاکامیدا بە هەزاران گوند نشین و خەڵک بێتاوان ئاوارە بوون ماڵ و زەوى خۆیان بە جێهیشت، هەروەها هەڕەشەى پەلاماردانى باشور کوردستان دەکەن، ئەم کردەوە نا بەجێ و نا مڕۆڤانەى دەوڵەتانى داگیرکەر لە سەر ناوى لێدان و پاکتاوکردنى پارتى کریکارانى کوردستان بە ناو کردوە، خوازیارن لە ژێر ئەم بیانوەدا دەسکەوتەکانى گەلى باشور بخەنە مەترسیەوە لێدانى کوشندە لە دەسەڵاتى باشور بدەن و ئاکامەکەشى بخەنە ئەستۆى (pkk)، بە تایبەت دەوڵەتى تورکیاى ڕەگەز پەرست و شۆفێنى چەند ڕۆًژیکە لە ڕێگاى پەرلەمانەوە چراى سەوزى بۆ جەنەڕاڵە تورانیەکان هەڵکردووە سەر پشکیان کردون ئۆپراسێون بکەنە سەر باشورى کوردستان، بڕیاردانى پەلاماردانێکى وەها بڕیاردانى شەرە لە دژى نەتەوەى کوردستان، واتە هەوڵدانە بە سەر لە نوێ دروست کردنەوەى شەڕى ناوخۆ لە کوردستان واتە هەوڵدانە بە ووتەى خۆیان شەڕى کورد بە کورد بە ئەنجام بدە جارێکى تر گوڕ بدەنەوە، باجەکەشى هەر نەتەوەى کورد بیدات هەر بۆیە نەتەوەکەمان بە گشتى و باشوور بە تایبەتى لە ئاستى ئەم پیلانگێریەدا ووشیار بن و نەهێلن مەرامى گورگە تورانیەکان بەئاکام بگات لە پێناوى بەرژەوەندى باڵاى نەتەوەیدا هەموو دەست لە ناو دەست بکەینو بە ئیرادەیکى پوڵاینەوە خەباتى نەتەویمان گوڕ پێبدەین و دروشمى (باکور باشور روژهەلات یەک دروشم ویەک خەبات) بکەینە وێردى سەر زمانمان و پشگیرى و هاوسۆزى خۆمان بو گەلەکەمان لە هەر جێگەیەک بێ دەڕبرین و ببینە پەرژینێکى پوڵاین لە دەورى بزوتنەوەى رزگارى خوازى گەلەکەمان.
بۆ گەلى خۆڕاگرى باشورى کوردستان و هێزو لایەنە سیاسیەکان
لەلاى هەموومان رون و ئاشکرایە کە بزوتنەوەى پارتى کرێکارانى کوردستان لە مێژووى خەباتى خۆیدا لەگەڵ بەرێوە چونى رەورەوى خەباتى نەتەوەکەمان لە هەموو بەشەکانى کوردستان رۆلێکى گرنگى هەبوە بۆ سەرخستنى دۆزى رەواى نەتەوەکەمان، بەتایبەت لە باکورى کوردستاندا گەلى کوردى لە توانەوە رزگار کرد، کردى بە خاوەن ئیرادەیەکى سەربەخۆ لە جێگاى خۆ ئینکار کردن و رەتکردنەوەى ناسنامەى نەتەوەیى ئێستا نەتەوەکەمان لە هەرکات زیاتر پشت ئەستورە بە ئیرادەى شۆرشى رزگاریخوازى نەتەوەیمان، کەواتە شۆرش رزگارى نەتەوەى بەرێبەرایەتى(pkk)مایەى لاوازی نیە بۆ دەسکەوتەکانى باشورى کوردستان بەڵکو خاڵى هەرە بەهێزى پشتوانى حکومەتى باشوور، دەخوازن بەم پیلانە هێرشى بکەنە سەر دەسکەوتەکانى گەلەکەمان لەباشوور، هەربۆیە لە بەرامبەر ئەم پیلانە شەڕخوازیەى دەوڵەتى تورکیا و داگیرکەرانى کوردستان بەگشتى هەڵوێستى نەتەوەیمان پتەو تر بکەین و زیاتر گوڕ بەچالاکیەکانمان بدەین، بۆ ئەم مەبەستە رۆژى 19/10/2007 کۆبوونەوەیەکى سێقۆڵى لەنێوان (پارتى سەربەخۆیى کوردستان، پارتى چارەسەرى دیموکراتى کوردستان، دەستەى پێشمەرگە دێرینەکانى پاسۆک) ئەنجام درا، لەئەنجامدا کۆمیتەیەک بەناوى (کۆمیتەى بەرگرى لە کوردستان) پێکهات بۆ بەردەوام کردن و پشتگیرى کردنى ئەو چالاکیانە کە لە شارو شارۆچکەکانى کوردستان پێش کەوتوون وە هەوڵ بدرێت بەرەیەکى نەتەوەى لە ناخۆى باشورى کوردستان و سەرتاسەرى کوردستان پێک بهێنرێت بۆ بەرەنگار بونەوەى هەر پەلامار و هەرەشەیەک کە بکرێتە سەر باشوورى کوردستان لەلایەن داگیرکەرانى کوردستان، لەسەر ئەم بنەمایە ئاواکردنى زەمینەى کۆنفرانسێکى نەتەوەیى و هێزێکێ بەرگرى نەتەوەیى لە تەواوى کوردستاندا، چونکە بەتەنها لەبەرامبەر پیلان و نیەتى شەڕخوازانەى دەوڵەتى تورک و داگیرکەرانى کوردستان بەگشتى لە هەرکاتێک زیاتر بەستنى کۆنفرانسێکى نەتەوەیى پێوستیەکى مێژووییە و لە رێگاى وەها کۆنفرانسێک پیلانگێرى سەر گەلەکەمان پوچەڵ دەکرێتەوە، بانگەوازى بۆ هەر پارت و رێکخرا وى هەر بەشى وولڕت هەیە دەرگامان واڵایە بۆ فراوانکردنى ئەم کۆمیتەى ئاوا بووە.
کۆمیتەى بەرگرى لە کوردستان 2007/10/20

هه‌ژمارێکی به‌رچاو دیلی تورک که‌وتوونه‌ته‌ ده‌ست گه‌ریلاکانی کورد

هه‌ژمارێکی به‌رچاو دیلی تورک که‌وتوونه‌ته‌ ده‌ست گه‌ریلاکانی کورد

2007 10 21 - 13:55

به‌ گوێره‌ی ئه‌ندامی کۆنسه‌ی هێزه‌کانی پاراستنی گه‌ل، خالیس ئۆجه‌ر، له‌و شه‌ڕ و پێکدادانانه‌ی که‌ له‌ هه‌رێمی شێرناخی باکووری کوردستان ڕووی داوه‌ هه‌ژمارێکی به‌رچاو سه‌ربازی تورک کوژرا و بریندار بوونه‌ و له‌ هه‌مان کاتدا زیاتر له‌ 10 سه‌ربازی تورک به‌ دیلی کوتوونه‌ته‌ ده‌ست هێزه‌کانی گه‌ریلا.
فه‌رمانداری ئۆپه‌راسیۆنه‌کانی سه‌ربازی تورک له‌ شێرناخ هه‌ژماری کوژراوانی تورکی به‌ 18 سه‌رباز، 16 بریندار و 10 دیل ڕاگه‌یاند. به‌ڵام سه‌رچاوه‌کانی هێزی پاراستنی گه‌ل ئاماژه‌ به‌وه‌ ده‌که‌ن که‌ کوژراوان زۆر له‌وه‌ زیاترن که‌ تورکه‌کان دانیان پێداناوه‌.
خالیس ئۆجه‌ر ڕایگه‌یاند که‌ ئه‌و شه‌ڕه‌ له‌ پێده‌شته‌کانی شێرناخ بۆ تۆڵه‌سه‌ندنه‌وه‌ی شه‌هیدانی دوایی و هاوکات بڕیاری پارله‌مه‌نی تورک بۆ هێرش کردنه‌ سه‌ر باشووری کوردستان پێکهاتووه‌.

کچە گەریلا "سەرهەڵدان سەرکەوتن": دواى هەفتەیەک دابڕان دووبارە گەیشتینەوە لاى هەڤاڵان

کچە گەریلا "سەرهەڵدان سەرکەوتن": دواى هەفتەیەک دابڕان دووبارە گەیشتینەوە لاى هەڤاڵان

2007 09 30 - 13:03

سەباح نوری

هێزەکانمان لەبنارو سەرى چیاى مەتینا جێگیرببوو، هەندێ هێزى تازەشمان بۆهاتبوو، ئەوان هەندێ بێ ئەزموون بوون، بەڵام لەرووى تەندروستى و فیزیکییەوە لەئێمە باشتر بوون. لەو رۆژانەدا لە فەرماندەى گشتیمانەوە ئاگادار کراین کە هێزەکانى دووژمن لە ئامادەباشیدان بۆ ئەوەى پەلامارى بنکەو بارەگاکانمان بدەن.

----------------------------------------------------
دواى چەند رۆژێک فڕۆکە جەنگییەکانى تورکیا دەستیان بە بۆردومانی کامپەکەمان کرد، چەند هەڤاڵێک بە سووکى و هەڤاڵێکى کچ بەسەختى بریندار بوو، ئەمەش هێماى ئەوە بوو کە لەرۆژانى داهاتوودا هێزەکانى دووژمن دەست بە ئۆپەراسیۆن دژ بە هێزەکانمان دەکەن. ئەو شەوە کەوتیینە بارى نائاساییەوە و بەدەوروبەرى خۆماندا بڵاوبووینەوە. رۆژى دواتر کە رۆژێکى خۆشى مانگى ئەیلوولى ساڵى (1995) بوو، هەڤاڵانی خاڵە بەرزەکانى سەر کامپەکەمان بە بێتەلەوە ئاگاداریان کردینەوە کە دووژمنان لە باکوورو باشوورەوە بەرەو چیاى مەتینا دێن و کاتژمێر دواى کاتژمێر لە هەوڵى ئابڵۆقەدانمان دان. هەر بۆیە گروپێکى گەریلاى کچ و کوڕ ئەرکى بۆسەدانانمان لەبەرامبەر هێزەکانى دووژمن پێسپێردرا. هەموو هەڤاڵە کچ و کوڕەکان بە ئەزموون و تازەکان کەوتینەڕێ بۆ شوێنى بۆسەدانینەکە. تاریک و روونى سەرلەبەیانى بوو کە بەڕێگادا دەڕۆیشتین، دوو دوو هەریەکەو چەند مەترێک لەیەکترى دووربووین، هەر لەوکاتەى کە بەوریایى و بەپەلەى و بێدەنگ بەرەو شوێنى بۆسەکە دەچووین لەپڕێکدا مینێک بەهەڤاڵێکدا تەقییەوە، هەر زوو گەیشتینە سەر ئەو هەڤاڵە. دیمەنێکى زۆر بەئێشم بەرچاو کەوت. هەڤاڵ رووناک کە کچێکى تازە بەشداربووى خەڵکی شارۆچکەى دێرکى رۆژئاواى کوردستان بوو، هەر دوو لاقى بەکاریگەرى مینەکە پەڕیبوو، هەڤاڵ دەمهات کە لاوێکى خەڵکى شارۆچکەى عەفرینى رۆژئاواى کوردستان بوو بەچەند شوێنێکەوە بریندار بوو. هەرهەموو هەڤاڵان بەو رەوشەى کەهەڤاڵ رووناک دووچارى هاتبوو زۆردڵتەنگ و خەمگین بوون، بەتایبەتی کاتێک سەرنجى هەڤاڵانى دەوروبەرى دەداو دەیگووت:" هەڤاڵان دەبینن چیم بەسەر هات، زۆرم حەز لە چیاو شاخەکانى وڵاتەکەم دەکرد، دەمویست هیچ نەبێت چەند ساڵێک تیایدا ژیان بکەم، دەست لەملیان بکەم و لەباوەشیاندا بحەسێمەوە، کەچى وا هەردوو لاقم پەڕى و ئەو ئاواتەم نەهاتەدى"، بەچاوى فرمێسک و خەمگینەوە هەوڵماندەدا برینەکانى بپێچینەوە و خوێنەکەى رابگرین. بەڵام بێسوود، رۆحى پیرۆزى لەنێو دەستمانداو بە بەرچاومانەوە بەرەو ئاسمان فڕى. چوار هەڤاڵ ماینەوە بۆ شاردنەوەى تەرمى ئەم هەڤاڵە کچەمان و گواستنەوەی هەڤاڵە بریندارەکە بۆ نەخۆشخانەکەمان لەبنارى شاخى مەتینا کە گەڕاینەوە لاى هەڤاڵانى کامپەکە زۆر ماندووبووین لەرەوشەکە ئاگاداریانمان کردەوە. دیاربوو لە قۆڵەکانى ترەوە هێزەکانى دووژمن لەگەڵ هەڤاڵاندا کەتبوونە ناو پێکدادانەوە، چەند هەڤاڵێکى دیکەش بریندارببوون. فەرماندە سەربازییەکانمان دەرکیان بەوە کردبوو شەڕو پێکدادان هەرچى دەچێ چڕترو توندتر دەبێت، دووژمن بە هەموو توانستەکانییەوە رووى هێزەکانى داوەتە کامپەکەمان، بۆیە بڕیاریاندا ئەو هەڤاڵانەى کە بریندارییەکەیان سووکە تەڤلى تیمە شەڕکەرەکان بکەن و ئەوانیش کە بریندارییەکەیان سەختە و هیچ ناتوانن بجوڵێن بگوێزرێنەوە بۆ شوێنى نادیارو دوور لە شوێنى پێکدادانەکە. دوو هەڤاڵى کچ و هەڤاڵێکى کوڕ بەناوى بەرخۆدان لەگەڵ ئەو سێ هەڤاڵە بریندارە ماینەوە، یەکێکیان کچ و دووانەکەى تریان کوڕ بوون، ئەو هەڤاڵە کچەى کە لەگەڵماندا مابووەوە ناوی نالین بوو و کارى تیمارکردن و دەرزى لێدانى دەکرد، هەڤاڵانى کامپەکە تیم تیم روویان لەو دەڤەرانە کرد کە پێکدادانى تێدا خەست بوو. ئێمەش روومان کردە دۆڵێک کە لە کۆتاییەکەیدا زۆر کون و ئەشکەوتى تێدا بوو، وێڕاى ماندبوون و بارى گران و تێکهەڵچوونى دەروونییەوە گەیشتینە کۆتایى دۆڵەکە، تازە گەیشتینە ئەو جێگای مەبەست، ئەوەندەمان زانى لەسەرى کێوەکانى سەر سەرمانەوە هاوارو قیڕو هەرا دەستیپێکرد، دواتر دەنگەکان نزیکتربوونەوە لێمان، بۆمان دەرکەوت ئەو دەنگانە دەنگى پێشمەرگەن و بانگماندەکەن بۆ ئەوەى خۆمان بەدەستەوە بدەین، جارنا جاریش بە شێوازێکى زۆرخراپ جنێویان پێدەداین و قسەى وروژێنەریان دەکرد. بۆ ئەوەى ئێمە کاریگەر بکەن و دەستیان لێبکەینەوە، چونکە بەخۆیان نەیاندەتوانى بێنە سەرمان.
ئەو شوێنەى کە ئێمەى لێبووین پێیان دەووت (گۆلکا) بەرامبەر دەڤەرى کانى ماسى بوو. هەردەچوو دەنگەکان نزیکتر دەبوونەوەو پێشمەرگەکان هەم جنێو و قسەى ناشرینیان پێدەداین و هەمیش فیشەکیان پێوەدەناین، هەڤاڵانى بریندار داوایان لەئێمە دەکرد کە ئەوان بەجێبهێڵین و نابێت خۆمان بە شەهیدکردن بدەین، ئەوانیش نارنجۆکیان هەڵدەگرن و کاتێک پێشمەرگە بچێتە سەریان بەخۆیاندا دەیانتەقێننەوە، بەڵام ئێمە ئەم شتەمان پەسند نەکرد، پێکەوە ماینەوە. دواى ماوەیەک هەڤاڵانى کوڕ گووتیان دەبێ چى زووترە نارنجۆکەکانمان بەخۆماندا بتەقێنینەوە، بەڵام ئێمە ئەو شتەمان بەراست نەبینى، گووتمان: دەکرێ پێشمەرگەکان بەجێگەکەمان نەزانن و بۆ ئەوەش هاوارو قیڕەو هەراو هوریاو جنێو دەدەن، گووتمان کاتێک هاتنە سەرمان خۆمان بەدەستەوە نادەین و نارنجۆکەکانمان بەخۆماندا دەتەقێنیینەوە. هەر چۆنێک بوو هەڤاڵانى کوڕمان بە بۆچوونى خۆمان قایلکرد. رۆژ بەرەو رۆژ ئاوا دەچوو، دنیا تاریک دەبوو، پێش ئەوەى تاریکى باڵ بکێشێ بەسەرماندا دووبارە دەنگى پێشمەرگەکان دەهات، ئەمجارە بانگى هاوڕێکانى خۆیان دەکرد بۆ ئەوەى بگەڕێنەوە دواوە. دواى چوونى پێشمەرگەکان هێدى هێدى هەستمان بە ئێش و ئازارو ماندووبوون دەکرد، زۆر برسى بووین، ماوەیەک بوو دواى ئەو هەموو چوون و هاتنە ئاومان نەخواردبووەوە، بێتەلەکەمان لەکارکەوتبوو، زۆر مەراقى بیستنى هەواڵى هەڤاڵانمان بووین، نەماندەزانى چیان بەسەر هاتووە، کێ ماوەو کێ بریندارە، تەنها دەنگى تەقینى چەکى قورسمان دەبیست. بیرمان لەلاى هەڤاڵان بوو، لەلایەکى تریشەوە دەبوو شتێکمان بۆ هەڤاڵانى بریندار پەیدا بکردایە. هەندێ دەرمان و دەرزى بەلاى بریکارى دکتۆرەکەوە مابوو، بەڵام نان و ئاومان نەبوو، هەڤاڵانى بریندار رەوشى تەندروستیان زۆر خراپ ببوو، بۆیە ناچار بڕیارماندا ئەو سێ هەڤاڵەى کە ساخین بچینە گوند شتێک بۆ ئەو هەڤاڵانە بهێنین. بەو شەوە تاریکە بێئەوەى بتوانین چرا یان شتێکى تر بەکار بهێنین، بێئەوەى بزانین کە پێشمەرگەکان لەدەوروبەرى گوندەکە ماونەتەوە روومان لەیەکێک لە گوندەکان کرد، لەڕێگا زۆر ماندوو بووین، چەندین جار لەدارو بەردمان داو بەملاو بەولادا دەکەوتین، وێڕاى ئەو هەموو زەحمەتییە گەیشتینە گوند، هەڤاڵە کچەکەى ترمان لە دەرەوە هێشتەوە من و هەڤاڵە کوڕەکە چووینە ماڵێکەوە، وامان تێگەیاندن کە هێزێکى زۆر گەورەمان لەگەڵدایە بەرەو ناوچەى هەفتانین دەچین، جودا لە ئاو پارەى شتەکانى ترمان هەمووى بە خاوەنەکانیاندا، خەڵکى گوندەکە زۆر سەرسام ببوون، دەیانگووت: هەزاران پێشمەرگە لەو دەوروبەرە بوون، چۆن لەیەکتر راست نەهاتن، ئێوە وەک جنۆکەن! لەخەڵکى گوندەکە تێگەیشتین کە پێشمەرگەکان دەڤەرەکەیان بەجێهێشتووەو رۆیشتوون. بەو شەوە ناچار بووین بگەڕێینەوە لاى هەڤاڵانى بریندار، ئەم جارەیان رۆیشتنمان زۆر زەحمەتتربوو، چونکە دونیا تاریکتر ببوو، شتێکى زۆرمان پێبوو، بەهەرحاڵ گەڕاینەوە لاى هەڤاڵانى بریندار، بەبینینى ئێمە زۆر خۆشحاڵ بوون، ناچاربووین بەو شتانە حەوت رۆژ لەو جێگەیەدا بمێنینەوە، دەبوو خواردن و ئاوەکە وا بەکاربهێنین کە بەشى زۆرترین ماوەمان بکات، رۆژى وا هەبوو یەک جار ئاومان دەخواردەوە خواردنەکانمان بەزۆرى بەبریندارەکان دەدا، زۆر جار ئێمە خۆمان بەبرسێتى و تێنوێتى دەهێشتنەوە، نەماندەتوانى بچینە گوندەکان، بۆ ئەوەى خۆمان ئاشکرا نەکەین و شوێنەکانمان نەبێتە ئامانجى پێشمەرگەکان، چونکە لە گوندەکان کەسوکارى پێشمەرگە هەبوو، دەترساین شوێنەکەمان ئاشکرا بکەن و پێشمەرگە بێتە سەرمان. زۆر و زەحمەتییەکى زۆرمان بینى و زۆرماندووبووین، نەماندەزانى چۆن خۆمان بگەیەنینە لاى هەڤاڵان، چونکە دەمانزانى ئەوانیش ئێستا لەخەمى ئێمەدان و حەزدەکەن هەواڵمان بزانن.
دوانیوەڕۆ بوو، سەرە پاسەوانێتى من بوو، دەوروبەرمان هەموو سەخت بوو، تەنها دۆڵەکەى بەرامبەرمان نەبێت کە رێگەکەى دەهاتە لامان. بۆیە چاومان لە دۆڵەکەى ژێرمان بوو، پاسەوانێتیم دەکرد بۆ ئەوەى کە شتێک روویدا هەڤاڵان ئاگاداربکەمەوە، هێدى هێدى تیژى تیشکى رۆژ دەشکاو رووەو رۆژئاوا دەبوو، لەپڕێکدا وەک ئەوەى خەون ببینم، دوو هەڤاڵ بەرچاوم کەوتن، خۆم پێڕانەگیرا هاوارم کردو قیڕاندم هەڤاڵان، وا هەڤاڵ هاتن، هاوارەکەم هێندە بەرزبوو، هەڤاڵانى خستبووە بارێکى خراپەوە، بەڵام دواتر هەڤاڵان هاتن و لێمان نزیکبوونەوە، دوو هەڤاڵەکە کوڕ بوون ئەو هەڤاڵانە لەو هەڤاڵانە بوون کە پێش شەڕەکە لە کەمپەکەدا پێکەوە بووین و شوێنەکەیان پێدەزانى، بەڵام لەو بڕوایەشدا نەبوون کە ئێمە ساخ و سەلامەت بین. بەڵام هەر حەزیان کردبوو سۆراخمان بکەن و بزانن چیمان بەسەر هاتووە. ئەو دوو هەڤاڵە دوو وڵاخیشیان لەگەڵ خۆیان هانیبوو، هەندێ راوەستاین هەتا دونیا بەتەواوەتى تاریک بوو. دواتر هەڤاڵانى بریندارمان لە وڵاخەکان سوار کردو بەرەو چیاى مەتینان بەڕێکەوتین. چونکە هەڤاڵان هاتبوونەوە شوێنە کۆنەکانى خۆمانى پێش شەڕ. چەندین کاتژمێر بەڕێوەبووین دواتر گەیشتینە جێى مەبەست. هەڤاڵان لەپێشوازیدا بوون کە لەهەڤاڵان نزیکبووینەوە خۆم پێڕانەگیرا، دام لەقوڵپەى گریان و خۆم هاویشتە باوەشیانەوە، هەڤاڵانیش وەک یەکێک شتێکى ئێجگار بەنرخ ببینێتەوە لە خۆشیانا شۆک ببوون. هێندەبوو لە خۆشیا بفڕن.
دواى چەند رۆژ لە حەسانەوە رووداوەکان بەبەرچاوى من وەکو فیلم دیمەن لەدواى دیمەن تێدەپەڕین، بەڵام گووتەکانى شەهید رووناک گڕى لەناخم بەرداو فرمێسکە سووتاوەکان دڵۆپ دڵۆپ لەچاومەوە شۆڕ دەبوونە خوارەوەو حەسرەتى بینینى کوردستان و عەشقى شەهید رووناک ئاگرى شۆڕشێکى لە ناخمدا داگیرساند.

( ڕووناهی- ته‌وار - ئاره‌زوو ) سێ کچه‌ گه‌ریلا شه‌هید- سێ ئه‌ستێره‌ی پڕشه‌نگدار له‌ ئاسمانی تاریکی ڕ

( ڕووناهی- ته‌وار - ئاره‌زوو ) سێ کچه‌ گه‌ریلا شه‌هید- سێ ئه‌ستێره‌ی پڕشه‌نگدار له‌ ئاسمانی تاریکی ڕۆژهه‌ڵات...

2007 10 19 - 13:22

نووسینی : عه‌لی فوڕات دۆت- مه‌هاباد

ڕوناهی خه‌ڵکی شاری سنه‌ بوو. له‌ ناو بنه‌ماڵه‌یه‌که‌ی هه‌ژار له‌ دایک ببوو. یه‌که‌مین جار له‌ مه‌هاباد بینیمان. کاتێک که‌ ده‌یویست له‌ وه‌رزی زستان - ساڵی 1999 - له‌ گه‌ڵ چه‌ند کچی دیکه‌ی سنه‌یی بچێته‌ چیاکانی کوردستان و ته‌ڤلێ ڕیزی گه‌ریلاکانی PKK بێت. دواتریش به‌ هه‌زار زه‌حمه‌ت چوونه‌ " دۆڵی خه‌رپاپ" و له‌وێشه‌وه‌ کاتێک گه‌یشتبوونه‌ ناو هه‌ڤاڵان به‌ هۆی نه‌بوونی ڕێگا بۆ چوون به‌ره‌و قه‌رارگاکانی قه‌ندیل له‌ باشوور وه‌ک " شه‌هید هاروون" به‌ ناچار گه‌ڕابوونه‌وه‌ مه‌هاباد و دواتر له‌ ڕیگه‌ی سه‌رده‌شت و به‌ چوون بۆ قه‌ڵا دزێ خۆیان گه‌یاندبووه‌ چیاکانی قه‌ره‌داغ له‌ نێوان سلێمانی- شاره‌زوور و که‌رکووک.
ڕووناهی تینووی شۆڕش بوو. بۆ گه‌یشتنی بۆ ناو ڕیزی گه‌ریلاکان هه‌رگیز تووشی دوو دڵی نه‌بوو. ئه‌گه‌ر چی گه‌لێک جاران به‌ هۆی دڵناسکی بیری دایک و باوکی ده‌کرد و له‌ ڕێگه‌ دا بۆیان ده‌گریا، به‌ڵام کاتێک لێیان ده‌پرسین ئایا ده‌تانهه‌وێ بگه‌ڕێنه‌وه‌ ماڵه‌وه‌ ئه‌و ده‌یگووت:
نا ئاماده‌ نیم بگه‌ڕێمه‌وه‌ سنه‌ و له‌ ناو ژیانێکی پاشکه‌وتوو دا بژیم و ببمه‌ ژنی بنده‌ستی پیاوێک له‌ داهاتوو دا.
ڕووناهی چوویه‌ قه‌ره‌داغ و له‌وێ بوو که‌ په‌روه‌رده‌ی ده‌رسی ئاپۆئیستی بینی و ڕۆژ به‌ ڕۆژ به‌ شانازی و وره‌یه‌کی پۆڵایینه‌وه‌ باشتر خۆی پێش ده‌خست.

به‌ڵام ته‌وار کێ بوو؟
ناوی " سه‌یران عه‌زیزی " بوو. کچێکی دیکه‌ی فیدایی. کچێک له‌ بنه‌ماڵه‌یه‌کی ئێجگار هه‌ژار له‌ شاری مه‌هاباد. له‌ کۆڕی ئه‌ده‌بی شاری مه‌هاباد - ساڵی 1998 - له‌ گه‌ڵ هه‌ڤاڵ ئاره‌زوو و هێندێک کچ و کوڕی دیکه‌ به‌ جووڵانه‌وه‌ی ئاپۆچیه‌تی و چه‌ند تێکۆشه‌ری PKK یی ئاشنا ده‌بێت و دواتر به‌ بینینی چه‌ند گه‌ریلایه‌کی نهێنی کار له‌ ناو شار دا به‌ڵێنی تێکۆشان و گه‌یشتن به‌ ڕیزی هه‌ڤاڵان ده‌دات.
ته‌وار له‌ ژیانی خۆی دا سه‌ره‌تا زۆرترله‌ هه‌ر شتێک گرینگی به‌ ئه‌ده‌بیات و شێعر ده‌دا. به‌ڵام به‌ ناسینی گرینگی بابه‌تی ژن و بنده‌ستی هه‌زاران ساڵه‌ی ئه‌و ڕه‌گه‌زه‌ تێگه‌یشت که‌ گرینگترین کار بۆ ئه‌و تێکۆشان بۆ ئازادی ژنان و ئازادی گه‌له‌که‌یه‌تی.
ته‌وار - له‌ ساڵی 1999 - خۆی گه‌یانده‌ چیاکانی قه‌ره‌داغ و له‌ یه‌که‌مین که‌مپی تایبه‌ت به‌ خه‌باتی ڕۆژهه‌ڵاتی PKK ده‌ستی به‌ تێکۆشان و خۆ په‌روه‌رده‌ کردن کرد.

ئاره‌زوو.
دۆستێکی هه‌ڤاڵ ته‌وار بوو. ئه‌ویش سه‌ردانی کۆڕی ئه‌ده‌بی شاری مه‌هابادی ده‌کرد و له‌ ڕێگه‌ی شه‌هید ته‌واره‌وه‌ به‌ PKK ئاشنا بوو. به‌ڵام ئاره‌زوو دوای شه‌هید ته‌وار - ئه‌ویش له‌ ساڵی 1999 - که‌وته‌ ناو ڕیزی گه‌ریلا و له‌ گه‌ڵ ئه‌وه‌ش دا تێکۆشه‌رێکی بێده‌نگ و بێ ئیدیعا و که‌م وێنه‌ بوو. ئه‌و که‌م ده‌دوا به‌ڵام کچێکی پڕ بوو. ئاماده‌ی هه‌ر جۆره‌ تێکۆشانێک بۆ ئازادی خۆی و ڕه‌گه‌زی ژن و گه‌له‌که‌ی. ئاره‌زوو هه‌میشه‌ ئاره‌زووی هه‌بوو که‌ بتوانێ ببێته‌ نموونه‌ی ژنێکی فیدایی و PKK یی. ئه‌و به‌ ژیانی بێ ئیدیعای خۆی و به‌ سه‌بر و تێکۆشانی بێ راوه‌ستانی ه‌ به‌ فیدا کردنی هه‌بوون و گیانی خۆی، ئه‌و یه‌که‌ی ئیسپات کرد.

پاییزی ساڵی 2000 بوو که‌ هێزه‌کانی یه‌کیه‌تی نیشتیمانی کوردستان YNK به‌ فه‌رمان و هاوکاری ڕه‌ژیمه‌کانی فاشیست و دژه‌ کوردی ئێران و تورکیه‌ هێرشیان کرده‌ سه‌ر گه‌ریلاکانی سیاسی کاری PKK له‌ چیاکانی قه‌ره‌داغ هه‌ژماریان ئێجگار که‌م و زۆرتریان شه‌ڕڤانی نوێی ڕۆژهه‌ڵاتی بوون که‌ هه‌م چه‌کیان که‌م بوو و هه‌میش ته‌جرووبه‌ی شه‌ڕیان نه‌بوو- جیا له‌ چوار – پێنج هه‌ڤاڵی باکووری وه‌ک شه‌هید تانیا دێرسمی- به‌م شیوه‌یه‌ هه‌ڤاڵان له‌ برسیه‌تی و شه‌ڕێکی دژوار به‌ هه‌ژمارێکی که‌متر له‌ 40 که‌سه‌وه‌ له‌ به‌رامبه‌ر 3000 پێشمه‌رگه‌ی پیاوسالار و کوردی کلاسیک دا که‌وتنه‌ شه‌ڕ و له‌ گه‌ڵ ئه‌وه‌ش دا که‌ نان و ئاویان نه‌بوو و له‌ جیاتی نان، گه‌ڵای داره‌کان و خه‌میری ددانیان ده‌خوارد و به‌ که‌مترین ته‌جرووبه‌ و فیشه‌که‌وه‌ ، شه‌ڕێکی قاره‌مانانه‌ و بێ وێنه‌یان نواند و ده‌یان که‌س له‌ هێزه‌کانی هێرشکاریان به‌ سزای خیانه‌ته‌کانیان گه‌یاند و چه‌ندین هه‌ڤاڵیش شه‌هید که‌وتن و به‌ دیل گیران.
به‌ڵام ئه‌وه‌ی که‌ دیاره‌ شه‌هاده‌تی ئه‌و هه‌ڤاڵانه‌ شتێکی ئاسایی نه‌بوو. زۆربه‌ی دیله‌کان یان بێ چه‌ک بوون و یانیش بریندار که‌ به‌ ناحه‌زترین شیوه‌ لێپرسینه‌وه‌یان له‌ گه‌ڵ دا ده‌کرا و ته‌نانه‌ت چه‌ند که‌س له‌وانه‌ ته‌حویلی ئیتلاعاتی ئێران درانه‌وه‌ له‌ شاری سلێمانی !!!
له‌ هه‌مان کات دا که‌سانێکی وه‌ک هه‌ڤاڵ " زانا مه‌هابادی " به‌ نارنجۆک خۆیان به‌ سه‌ر دووژمن دا ته‌قانده‌وه‌ و کچانێکی وه‌کوو ئاره‌زوو و ڕووناهیش له‌ سه‌نگه‌ری شه‌ڕ دا ئاماده‌ نوبوون ته‌سلیمی بیری بنده‌ستی ژن و خیانه‌ت و پیاوسالاری ببن و خوێنیان له‌ گه‌ڵ هه‌ڤاڵانێکی وه‌ک " ئه‌شره‌ف و شاهۆ و ..." به‌ سه‌ربه‌رده‌کانی ڕه‌شی قه‌ره‌داغ دا ڕژا و ته‌واریش دوای کووشتنی چه‌ند خایینێک به‌ برینداری به‌ دیل گیراو درایه‌ به‌ نه‌فره‌ته‌وه‌ له‌ لایه‌ن هێزه‌کانی هێرشکار درایه‌ به‌ر گولله‌ و تیره‌باران کرا...

به‌ڵام ئه‌وه‌ی که‌ دیاره‌ " ڕوناهی سنه‌، ته‌وار مه‌هابادی و ئاره‌زوو مه‌هابادی' به‌ خوێنی خۆیان لاپه‌ڕه‌یه‌کی نوێیان له‌ مێژووی خه‌بات و تێکۆشانی گه‌له‌که‌مان له‌ ڕۆژهه‌ڵاتی کوردستان دا نووسییه‌وه‌:
لاپه‌ڕه‌یه‌ک له‌ خه‌باتێکی نوێ... خه‌باتی ئاپۆئیستی له‌ پێناو ( ئازادی ژن و ئازادی مرۆڤایه‌تی ...)

باهەموومان پێکەوە تەندروستی بەرێزعەبدوڵڵا ئۆجەلان بپارێزین

باهەموومان پێکەوە تەندروستی بەرێزعەبدوڵڵا ئۆجەلان بپارێزین

2007 10 18 - 11:44

بەهاری رابردوو لە رۆژی (1/3/2007) دا پارێزەرانی رێبەری کۆما جڤاکی کوردستان بەڕێز عەبدوڵڵا ئۆجەلان لەکۆنفرانسێکی رۆژنامەوانیدا لە رۆمای پایتەختی ئیتالیا رایانگەیاند کە لە ئەنجامی پشکنینی پزیشکییەوە دەرکەوتووە کە جەستەی بەرێز عەبدوڵڵا ئۆجەلان ژەهراوی کراوە، ئەو ژەهراویکردنەش لەگەڵ تێپەڕبوونی کاتدا کاریگەری نێگەتیڤ لەسەر تەندروستی دەکات و تووشی نەخۆشی درمی دەکات و لە ئەنجامدا ژیانی دەخاتە مەترسییەوە. بۆ ئەم مەبەستە پارێزەرەکانی داوایان لە دامودەزگا نێۆ دەوڵەتییەکان کرد، بەتایبەتی رێکخراوی بەرگریکردن لە ئەشکەنجە کەتوانای خۆیان بخەنە گەڕ بۆ پاراستنی ژیانی بەڕێز عەبدوڵڵا ئۆجەلان، لەهەمانکاتدا داوایان کرد کە هەڵوێستیان سەبارەت بەم بابەتە نیشانبدەن و فشار بخەنە سەر لایەنە پەیوەندیدارەکان بۆ ئەوەی هەستن بەئەرکی خۆیان و ژیان و تەندروستی بەڕێز عەبدوڵڵا ئۆجەلان بپارێزن.
ئێمەش کۆمەڵێک کەسی سەربەخۆ و نوێنەری پارت و رێکخراوی کۆمەڵگای مەدەنی، لەباشووری کوردستاندا وەکو هەڵوێستێکی نەتەوەیی و مرۆیی کۆمیتەیەکمان بەناوی (کۆمیتەی پاراستنی تەندروستی بەڕێز عەبدوڵڵا ئۆجەلان) دروستکرد. ئەوەبوو لەبەهاری ئەمساڵدا ژمارەیەک کۆڕ و سیمینار و چالاکی جۆاروجۆرمان ئەنجامدا، لە رۆژی ( 17/3/2007) بەبەشداری زیاتر لە (200) کەس لە خەڵکی سەربەخۆ و نوێنەری پارتی سیاسی و رێکخراوی مەدەنی لەهەولێر کۆنفرانسێکمان ئەنجامدا و لە کۆنفرانسەکەدا داوا کرا کە تیمێکی پزیشکی پسپۆڕی سەربەخۆ سەردانی بەڕێز عەبدوڵڵا ئۆجەلان بکەن و تەندروستی و ژیانی بخەنە ژێر چاودێرییەوە. هەروەها داوا لە دامودەزگا جیهانی و کوردستانییەکان و جەماوەری کوردستانیش کرا کە بۆ جێبەجێکردن یاخوود پێکهێنانی ئەم داخوازییانە بەئەرکی نەتەوەیی و مرۆیی خۆیان هەستن.
بۆ ئەم مەبەستە ئەوە بوو لەباشووری کوردستان شانبەشانی پارچەکانی تری کوردستان و دەرەوەی کوردستان چالاکی جوراوجۆر ئەنجامدرا و ئەوەبوو لە ئەنجامی ئەم چالاکیانەدا تیمێکی پزیشکی پسپۆڕی سەربە رێکخراوی بەرگرتن لە ئەشکەنجەی سەربە کۆنسەی ئەوروپا سەردانی بەڕێز ( عەبدوڵڵا ئۆجەلان)یان کرد ، ئەمەش وەکو هەنگاوی یەکەم لەلایەنی جەماوەری کوردستانەوە پەسەندکراو ئێمە وجەماوەریش چاوەرانی ئەوەبووین کە ئەنجامی پشکنینەکەیان ئاشکرا بکەن و رای گششتی لێ ئاگادار بکەنەوە و بەو پێیە هەڵوێستی خۆیان دیاریبکەن.
جەماوەری نیشتمانپەروەری کوردستان
چوار مانگ زیاتر بەسەر سەردانی تیمەکەی (CPT) (رێکخراوی بەرگرتن لە ئەشکەنجە) بۆ لای بەڕێز (عەبدوڵڵا ئۆجەلان) تێپەڕ دەبێت. بەڵام هەتا ئێستا هیچ ئەنجامێکیان بۆ رای گشتی رانەگەیاندووە. وەکو دەردەکەوێت تەندروستی بەڕێز (عەبدوڵڵا ئۆجەلان) یش لەم دواییەدا زۆر رووی لە خراپی کردووە و بەپێی لێدوانی خۆی و پارێزەرەکانی ئەو جێگەی تێیدایە هۆکارێکی سەرەکییە بۆ نالەباری باریی تەندروستی بەڕێزی. وەکو پارێزەرەکانی رایانگەیاندووە شێداری جێگەکەو ئەوهۆدەیەی کە بەڕێز ئۆجەلانی تێدایە کەشێکی وەهایە کە ئەگەر زوو فریای بەڕێزی نەکەوین ئەوا لەگەڵ مردندا ڕووبەڕوو دەبێتەوە، ئەم کەشەش بە زاناییەوە لەلایەن بەرپرسانی دەوڵەتەوەخولقێنراوە و دەوڵەتی تورکیاش هەتا ئێستا هیچ هەڵوێستێکی پۆزەتێفی سەبارەت بەم بابەتە نیشان نەداوە. گومانی تیادا نییە ئەم بارودۆخە بەم شێوەیە بەردەوام بێت ئەوا لەئایندەیەکی نزیکدا ژیانی بەڕێز (عەبدوڵڵا ئۆجەلان) دەکەوێتە مەترسییەوە. لەبەرامبەر ئەم بارودۆخەشدا جارێکی تر دامودەزگا نێو دەوڵەتییەکان بێدەنگن. ئەمەش بۆ خۆی شەرمەزارییە بۆ مرۆڤایەتی و ئەوانەی بەناوی مافی مرۆڤ و دیموکراتییەوە بانگەشە دەکەن. پارێزەرانی بەڕێز (عەبدوڵڵا ئۆجەلان) رۆژی (29/9/2007) لە برۆکسلی پایتەختی بەلجیکا لە بەردەم چالاکییەکی جەماوەرییدا رایانگەیاند کە سەرەڕای هەڵ و تێکۆشانی بێوچانایان بۆ ئەوەی (CPT) ئەنجامی پشکنینەکەی ئاشکرا بکات، بەڵام هەتا ئێستا ئامادە نین رایبگەینن و هەروەها ئەوەشیان راگەیاند کە هەوڵێکی زۆریانداوە بۆ ئەوەی کە جێگەی بەڕێز(عەبدوڵڵا ئۆجەلان) بگۆڕن و بخرێتە ژێر چاودێریی تەندروستییەوە، بەڵام هەتا ئێستا دەوڵەتی تورکیا ئامادەیی نیشان نەداوە بۆ جێبەجێکردنی ئەم داوایە. هەر لەوێدا داوایان لە جەماوەری کوردستان و دامودەزگا کوردستانی و نێو دەوڵەتییەکان کرد کە بۆ جێبەجێ بوونی ئەو داوایانە پشتگیریان بکەن و چالاکی جۆراوجۆر ئەنجام بدەن.
پارت و رێکخراوە مەدەنییەکان و جەماوەری کوردستان
ئێمە وەکو (کۆمیتەی پاراستنی تەندروستی بەڕێز عەبدوڵڵا ئۆجەلان) پێمان وایە کە ئاشکرا نەکردنی ئەنجامی پشکنینەکان و گرنگی نەدان بەباری تەندروستی بەڕێز (عەبدوڵڵا ئۆجەلان) هەڵوێستێکی سیاسییە و دوورە لە هەموو پێوانە و بەها مرۆییەکانەوە. ئەمەش ئەوە پشت راستدەکاتەوە کە دەوڵەتی تورکیا لەکەسێتی بەڕێز عەبدوڵڵا ئۆجەلاندا جینۆسایدی گەلی کورد بەڕێوەدەبات و دام ودەزگا نێودەوڵتیەکانیش چاوی خۆیان لەم تاوانە مرۆییە دەگرن. لەبەرئەوە بەئەرکی خۆمانی دەزانین بۆ سەرخستنی ئەو ئامانجانەی کە لەپێناویدا دروستبووین کاروچالاکی خۆمان بەردەوام بکەین. هەربۆیە لەچوارچێوەی ئەو هەڵمەتەی کە لە کوردستان و دەرەوەی کوردستان بۆ پاراستنی تەندروستی و ئازادی بەڕێز (عەبدوڵڵا ئۆجەلان) لەژێر دروشمی (ئتر بەسە) و ( وەک ئۆجەلان بژی و کار بۆ ژیاندنی بکە) دەستی پێکردووە، ئێمەش لەباشووری کوردستان و ئێراقدا کاروچالاکی ئەنجام دەدەین. داوا لە سەرجەم پارت رێکخراو و دەزگای مەدەنی و جەماوەری کوردستان دەکەین کە بەشداری ئەم چالاکیانە بکەن و بۆ خۆشیان لەچوارچێوەی ئەو دروشمانەدا چالاکی ئەنجامبدەن . لەم چالاکیانەدا ئامانجمان پاراستنی تەندروستی بەڕێز(عەبدوڵڵا ئۆجەلان)ە لەهەنگاوی یەکەمدا و دواتر ئازادبوونی بەڕێزێتی ، چونکە بەڕێز(عەبدوڵڵا ئۆجەلان) کەسایەتییەکی سیاسی و ئیرادەیەکی سیاسییە و تێزەکانی خزمەت بەچارسەری کێشەی کورد و کێشەکانی کۆمەڵگا دەکات و لەسەر کێشەیەکی کەسێتی خۆی دەستگیر نەکراوە، بەڵکو لەسەر دۆزی کورد و کێشەی ناسنامەی گەلی کورد دەست بەسەر کراوە. هەربۆیە هەرمامەڵەیەک لەگەڵ بەڕێز ئۆجەلاندا مامەڵەیە لەگەڵ دۆزی کورد و ناسنامەی کوددا. واتە ئێمە پێمان وایە هەتا دەوڵەتی تورکیا بەڕێز (عەبدوڵڵا ئۆجەلان) ئازاد نەکات، ئەوا ماف و ناسنامەی گەلی کوردیش نە لە باکووری کوردستان نە لەهیچ پارچەیەکی کوردستان و دونیا پەسەند ناکات و هەمیشە کاردەکات بۆ تێکدان هەر دەسکەوتێکی گەلی کورد. بەواتایەکی تر هەر کار و چالاکییەک دەوڵەتی تورک ناچار بکات کە ماف و ناسنامە و ئازادییەکانی بەڕیز (عەبدوڵڵا ئۆجەلان) پەسەند بکات دەبێتە هۆی پەسەند کردنی ماف و ناسنامەی گەلی کورد لەلایەن دەوڵەتی تورکیاوە و لە ئەنجامی ئەمەشدا دژایەتی دەوڵەتی تورکیا بۆ دەسکەوتەکانی گەلەکەمان بەگشتی و لە باشووریشدا بەتایبەتی نامێنێت و ئەمەش دەسکەوتەکانی گەلەکەمان و ماف و وناسنامەکەی گەرەنتی دەکات.
لەبەر ئەوە ئێمە داکۆکیکردن لە بەڕێز (عەبدوڵڵا ئۆجەلان) بەتەنیا وەکو بابەتێکی یاسایی و مرۆیی نابینین، راستە ئەمڕۆ لایەنی یاسایی و مرۆیی ئەم کێشەیە خۆی داوەتە پێش، بەڵام لەبنەڕەتدا کێشەکە بۆ خۆی کێشەیەکی سیاسیە و هەتا لایەنە سیاسەییەکەی چارەسەری نەبێت، ئەوا لایەنی یاسایی و مرۆییەکانیشی چارەسەری نابێـت. هەر بۆیە(CPT) ناتوانێت ئەنجامی ئەو پشکنینە بدات کە پێی هەستاوە و رژێمی تورکیاش هەموو توانای خستۆتە گەڕ بۆ ئەوەی (CPT) و کۆنسەی بەڕێوەبەرایەتی ئەوروپا روونکردنەوە لەسەر ئەم بابەتە نەدەن و بێدەنگ بن. هەر بۆیە ئێمە ئەم چواچێوەیەی خوارەوە دەکەینە ئامانجمان و لە پێناویدا تێکۆشان دەکەین.
یەکەم: داوا لە رێکخراوی بەرگرتن لە ئەشکەنجەی سەربە کۆنسەی ئەوروپا(CPT) دەکەین کە ئەنجامی ئەو پشکنینەی کە بۆ تندروستی بەرێز عەبدوڵڵا ئۆجەلانیان ئەنجامداوە بۆ رای گشتی رابگەیەنن.
دووەم: داوا لە (CPT) و دەوڵەتی تورکیا دەکەین کە لە هەنگاوی یەکەمدا شوێنی بەڕێز عەبدوڵڵا ئۆجەلان بگۆڕن و چاودێرییەکی باشی تەندروستی بکرێت.
سێیەم: لەهەنگاوی دواتردا کار دەکەین بۆ ئازادکردنی بەڕێز عەبدوڵڵا ئۆجەلان.
چوارەم: داوا لە جەماوەری کوردستان و پارت و رێکخراوەکانی کۆمەڵگای مەدەنی و رگەیاندنەکان دەکەین سەبارەت بەم رووداوە خاوەن هەڵوێست بن و چالاکی جۆراوجۆر ئەنجام بدەن.
پێنجەم: داوا لە سەرۆکایەتی هەرێمی کوردستان و پەرلەمانی کوردستان و حکومەتی هەرێمی دەکەین کە بەفەرمی هەڵوێست نیشان بدەن و داوا لە دەوڵەتی تورکیا و رێکخراوی (CPT) بکەن بۆ ئەوەی ئەنجامی پشکنینەکەیان ئاشکرا بکەن و جێگەی بەڕێزی بگۆڕن.
کۆمیتەی پاراستنی تەندروستی بەڕێز عەبدوڵڵا ئۆجەلان
(9/10/2007)

لاوانی ئاپۆجی شاری سنە ووشیاریان دا بە دەوڵەتانی تورکیا و ئێران

لاوانی ئاپۆجی شاری سنە ووشیاریان دا بە دەوڵەتانی تورکیا و ئێران

2007 10 19 - 15:00

لاوانی ئاپوجی سەر به کومیتەی شەهید هەڤاڵ ئاکیف له شاری سنه، به بۆنەی نۆهەمین سال وەگەری گەلەکومەی نێو دەوڵەتی سەر رێبەری گەلی کورد عەبدوڵا ئۆجەلان به ناوی ((با سەرۆک ئاپۆ بژییت و بژینیته وه )) بەیاننامەیەکی نوسراویان بڵاو کردەوە.
له بەیاننامەکه دا ده گوتری که نۆ سالە رێبەری گەلی کورد له گوشەگیریەکی بێ وێنه دایه و به فەلسەفەی ( بەرخودان ژیانه ) له ژێر درندانەترین ئەشکنجەکانی دەوڵەتی فاشیستی تورکیه دا ژیان بەسەر دەبات. ئەوان وەک لاوانی ئاپوجی وێڕای مەحکوم کردنی ئەو گەله کۆمەیه و ژەهراوی کردنی سەرۆکیان رادەگەیەنن که سیاسەتی دوژمنکارانه ی دەوڵەتی تورک و هەڕەشەکانی ئەوان بۆسەر باشوری کوردستان به ناوی دژایەتی لەگەڵ پ-ک-ک شیواندنی ئاسایشی خەڵکی سڤیل و توپ باران کردنی ناوچه سنوریەکان له لایەن دەوڵەتی کۆماری ئسلامی ئیرانه وە به بیانوی هەبونی گەریلاکانی پەژاک لەو دەڤەرانە، بەهیچ شێوەیەک قەبوڵ ناکەن. هەروەها دەوڵەتی تورکیایان له هەر چەشنه هێرش کردن بۆ سەر باشوری کوردستا ووشیار کردەوە و بەڵێنیان دا که کوردستانیان لێ بکەن به جەهەندەم و گورستان. وەهەروەها ووشیاریان دا کە نه پ-ک-ک و نه گەلی باشور بەتەنیا نین و ئەوان وەکو لاوانی ئاپوجی ئامادەی هەرچشنه گیان فیدایین له پیناو دەسکەوتەکانی گەلی کورددا.

پرۆژه‌ی مه‌ره‌خێل و مه‌به‌ستێکی گڵاو

پرۆژه‌ی مه‌ره‌خێل و مه‌به‌ستێکی گڵاو

 

منصور ایراندوست

له‌م چه‌ند رۆژانه‌ی رابردو دا باسێک له‌سه‌ر پرۆژه‌ی مه‌ره‌خێڵ هاته سه‌ر سایته‌کان.
ئه‌م پرۆژه‌یه زیاتر له ساڵێکه ده‌ست به‌کار بووه. ئه‌وه‌ی که جێگای سرنجه بێده‌نگی حیزبه‌کانی رۆژهه‌ڵات و حکومه‌تی هه‌رێم له‌سه‌ر ئه‌م پرۆژه ترسناکه‌یه٠ بێگومان پرۆژه‌یه‌کی ئاوه‌ها به‌ربڵاو و درێژخایه‌ن بۆ کورد و دانیشتوانی هه‌ردوو به‌ری سنور هیچ خێر و بێرێکی تێدا نیه٠ ئه‌وه‌ی که ده‌بێ زیاتر سرنجی بده‌ین مه‌به‌سته گڵاو وترسناکه‌کانی کۆماری ئیسلامی و سپای پاسدارانه٠ ئه‌م پرۆژه‌یه له‌م ناوچه‌یه له داهاتویه‌کی نه‌زۆر دوور کاره‌ساتی دڵته‌زێن ده‌خولقێنێ٠ هه‌ڵکه‌وتی جوغرافیای ناوچه‌که‌ش بۆخۆی جێگای لێوردبونه‌وه‌یه٠ ناوه‌ندی ئه‌م پرۆژه‌یه که ناوچه‌ی هه‌ورامان تا قه‌سری شیرین ده‌گرێته‌وه، مه‌ره‌خێڵه ،بۆیه به پرۆژه‌ی مه‌ره‌خێڵ ناودێر کراوه٠ مه‌ره‌خێڵ دوو کیلومتر له سنوره‌وه دوره و تا هه‌ڵه‌بجه‌ش ١٠ کیلومتری هه‌وایی ده‌بێ . ناوچه یه‌کی سه‌خت و شاخاویه؛ 20 گوندی ئه‌م ناوچه‌یه به ته‌واوی چۆڵ کراون وهیچ که‌سێک ئیزنی هاتووچوی بۆ ناوچه‌که نییه. ته‌نانه‌ت دانیشتوانی ئۆردوگانشینی ئه‌م گونده چۆڵ کراوانه بۆیان نییه له دوره‌وه‌ش سه‌یری ئه‌م پرۆژه‌یه بکه‌ن تا ده‌گات به ئیش و کار٠
ئه‌م پرۆژه‌یه ده‌کرێ دوو مه‌به‌ستی گڵاو و ترسناکی له پشت بێ . یه‌که‌م وشک کردنی سه‌رچاوه‌ی ئاوی به‌نداوی ده‌ربه‌ندیخان، که پێک هاتوون له چۆمه‌کانی سیروان، مه‌ره‌خێڵ ، لێڵه و زمکان ٠ لێکدانه‌وه‌یه‌کی سه‌رپێی له ئه‌گه‌ری وشک کردنی ئه‌م سه‌چاوانه‌ی به‌نداوی ده‌ربه‌ندیخان پیشان ده‌دات که کۆماری ئیسلامی، چ پرۆژه‌یه‌کی ترسناکی هه‌یه بۆ حکومه‌تی هه‌رێمی کوردستان، هه‌روه‌ها کاردانه‌وه‌ی وشک کردنی به‌نداوی ده‌ربه‌ندیخان له‌سه ردانیشتوانی ناوچه‌کانی هه‌ڵه‌به‌جه، شاره‌زوور، سه‌یدسادق، عه‌ربه‌ت، ده‌ربه‌ندیخان، که‌لار ،کفری وخانه‌قین ترسناک تر وتراژێکی تره٠ دووهه‌مین مه‌به‌ستی ئه‌م پرۆژه یه، و ،هه‌ڵسوکه‌وته‌کانیش ئه‌وه ده‌سه‌لمێنن، ئه‌و پرۆژه‌یه پرۆژه‌یه‌کی سه‌ربازی یه٠ ئه‌م پرۆژه‌یه له ژێر چاوه‌دێری راسته‌وخۆی خامنه‌یی و به‌ سه‌رپه‌ره‌ستی سپای پاسداران جێ به جێ ده‌کرێت٠ کومیته‌یه‌کی ئه‌منیه‌تی له به‌رپرسانی سه‌ره‌وه‌ی سپای پاسدارانی بۆ پێک هاتووه٠ ئه‌م کومیته‌یه بریتین له 1..جه‌میل بابایی جاش سه‌رداری سپای پاسداران و یه‌کێک له به‌رپرسانی پایه‌به‌رزی سپا له خۆرئاوای ئێران ٢..ئه‌کبه‌ر بابایی به‌رپرسی ئیداره‌ی ئیتلاعاتی باینگان و ئه‌ندامی به‌رێوه‌به‌ری ئیتلاعات له پاوه ٣..کاکه وه‌یس سوبحانی جاش سه‌رهه‌نگی خانه‌نشین٠ ئه‌رکی سه‌ره‌کی ئه‌م کومیته‌یه ته‌ئییدی سه‌لاحیه‌تی ئه‌و که‌سانه‌یه که له‌م پرۆژه‌یه دا کار ده‌که‌ن یان به‌شێوه‌یه‌ک هاتوچۆیی ناوچه‌که ده‌که‌ن٠ دیاری کردنی ناوچه‌یه‌کی ئاسته‌م و شاخاوی سه‌رسنوور بۆ پرۆژه‌یه‌کی خزمه‌تگوزاری و ئاوه‌دانی ،به ته‌واوی جێگای گومانه ٠ پرۆژه‌یه‌کی خزمه‌تگوزاری، بۆ هه‌رجێگایه‌ک و به‌ هه‌رمه‌به‌ستێک بێ، پێویستی به چاوه‌دێری خامنه‌یی و سه‌رپه‌ره‌ستی هێزێکی چه‌کداری وه‌ک سپای پاسداران نیه، کومیته‌ی ئه‌منیه‌تیش بۆ وه‌ها پرۆژه‌یه‌ک به‌ته‌واوی بێ مانایه٠ ئه‌ گه‌ر ئه‌م پرۆژه سه‌ربازییه ده‌کرێت دوو مه‌به‌ستی له‌ پشت بێ ١. ئێران له‌لایه‌ن کۆمه‌ڵگای نێوده‌وڵه‌تییه‌وه له ژێر زه‌خت دایه ،بۆ ده‌ست پێراگه‌یشتنی چه‌کی ناوه‌کی٠ له‌م پێناوه دا ده‌سگا جاسوسییه ئاسمانییه‌کان هه‌موو شوێنه‌کانی به‌رهه‌م هێنان و حه‌شارگه‌کانی ئه‌م جۆره چه‌کانه‌یان شناسایی کردووه. ئێستا کۆماری ئیسلامی پێویستی به حه‌شارگه‌ی تازه هه‌یه ٠ وا دیاره ئه‌م پرۆژه‌یه پرۆژه‌ی عه‌مبار کردنی چه‌که دووره هاوێژ و گۆمه‌ڵکوژه‌کانی رژیم و شوێنه ونوکلێکرییه‌کانی بێ ٠ له وه‌ها حاڵه‌تێکدا ئه‌گه‌ری لێدانی ئامریکا و هاوپه‌یمانه‌کان له‌م شوێنه ده‌بێ چاوه‌روانیی کاره‌ساتی یه‌کجار دڵته‌زێن و مه‌رگ هاوه‌ربین ، که زیانه‌که‌شی بێگومان بۆ کورد و حکومه‌تی هه‌رێم ده‌گه‌رێته‌وه ٠ ٢.. هه‌ر وه‌ک باس ده‌کرێت ئه‌گه‌ری لێدانی گورزی سه‌ربازی له لایه‌ن ئامریکا و هاوپه‌یمانه‌کانه وه له ئێران له ئارادایه ، ١٢٠٠ بنکه و باره‌گای سه‌ره‌کی ئیران ده‌سنیشان کراون. ئێرانیش له دژکرده وه‌یه‌ک دا ٧٠٠ بنکه و باره‌گای دژبه‌رانی خۆی له رۆژهه‌ڵاتی ناوه‌راست ده‌ستنیشان کردوه بۆ لێدان٠ ئه‌م ناوچه‌یه گونجاوترین و موناسبترین شوێنه بۆ به‌کارهێنانی چه‌که دورهاوێژ و گۆمه‌ڵکوژه‌کانی کۆماری ئیسلامی له رۆژهه‌ڵاتی ناویین. که‌وابو ده‌کرێ بڵێین پرۆژه‌ی مه‌ره‌خێڵ ،پرۆژه‌یه‌کی ترسناکی دیکه‌ی کۆماری ئیسلامی ئێرانه دژی گه لی کورد.

لێدوانی کوردیناسیونی PJAK بە بۆنەی ساڵیادی شەهیدبوونی هەڤاڵ فەرهاد پەپولە

لێدوانی کوردیناسیونی PJAK بە بۆنەی ساڵیادی شەهیدبوونی هەڤاڵ فەرهاد پەپولە

 

هەروەکوو دەزانرێ رژێمی ئێران لە بەردەوامی کۆنسێپتە هاوبەشەکەی دا لە گەل رژێمی تورکیا هێرش و گوشار و زەخت و زۆری لە سەر گەل و گەریلا زیاد کردووە و بە بێ رەچاوکردنی هیچ بنەما و پرەنسیپێکی ئەخلاقی و مرۆیی و دوور لە گشت پێوانە گەردوونییەکان بە هەموو هێز و توانایەوە بەرپەرچی هەر جۆرە دەنگێکی ئازادیخوازی دەداتەوە و نموونەی هەرە دواییش پیلانگێری و هێنانە سەری ژمارەیەکی زۆری جاش و پاسدار و ئۆتۆمۆبیلی سەربازی و چەکی گرانە لە سەر کادیر و وڵاتپارێزانی PJAK و شەهید کردنیانە بە شێوەیەکی نامرۆڤانە.
هەڤاڵ فەهاد وەک کادیرێکی لێهاتوو و زائا، یەکێ لەو کادیرە پێشەنگانەی خەباتی ئازادیخوازی گەلەکەمان لە رۆژهەڵات بوو کە هەر لە سەرەتای دامەزراندی PJAK بە هێز و ورە و باوەرییەکی مەزنەوە لە پێناو خزمەت بە گەل، بە سوور بوون و جیددییەتێکی بێ وێنەوە خۆی تەڤلی ئەم خەباتە کرد و هەتاکوو دوایش بە بێ هیچ دوودڵی و حیساباتێکی جودا وەک شۆرشگێر و میلیتانێکی راستەقینە، خزمەتی گەلە چەوەساوەکەی کرد و سەربەرزانە گەیشتە لووتکەی بەرزی شەهادەت. ئێمە وەک PJAK ئەو کردەوە تیرۆریستییەی رژێم بە توندی شەرمەزار و ریسوا دەکەین و لە کەسایەتی ئەو هەڤاڵانە و هەموو هەڤاڵانی شەهیددا سۆز و پەیمانی خۆمان جارێکی دیکە بە رێبازی ئەوان دووپات دەکەینەوە و بەڵێن دەدەین کە تا دوایی پابەندی ئاوات و ئامانجەکانیان بین و بۆ بەدیهێنانی ژیانێکی بەشەرەف و ئازاد هەتاکوو دوایی لە سەر رێبازی ئەوان پەرە بە تێکۆشان و خەباتمان بدەین. ئێمە وەک PJAK پرسە و سەرەخۆشی خۆمان ئاراستەی گەلی کورد بە گشتی و گەلی وڵاتپارێزی مەریوان و بنەماڵەی سەربەرزی شەهید فەرهاد پەپولە دەکەین و بەتایبەت بانگ لە گەلەکەمان لە رۆژهەڵاتی کوردستان و لە سەرووی هەموویاندا ژنان و لاوان و دایکان و سەرجەم چین و توێژەکانی کۆمەڵگا دەکەین کە خاوەندارێتی لە شەهید فەرهاد و سەرجەم شەهیدانی شۆرش بکەن و بەشدارییەکی چالاکانە لە بۆنەکانی رێز و یادکردنەوەی شەهید فەرهاددا بکەن. شەهید فەرهاد لە ژیان و خەباتی خۆیدا هەتا دوایی خاوەن ورە و مۆراڵ بوو و وەک لاوێکی چالاک، پابەندی پێوانەکانی ژیانێکی شەرەفمەندانە و ئازاد بوو و لە گەوهەری خۆیدا نوێنەرایەتی حەز و ئاوات و خەونەکانی لاوێکی کورد، بە سەربەرزی و سەرفرازی وڵات و گەلەکەی دەکرد و هەر لەم پێناوشدا بێوچان لە کار و خەبات دا، بۆ بەدیهێنانی ئەم ئامانجانە نموونەی لاوێکی شۆرشگێری لە خۆیدا بەرجەستە کردبوو. شەهید فەرهاد لاوێکی تێکۆشەر و شۆرشگێر و سیمبولی تێکۆشانی لاوانی رۆژهەڵاتی کوردستانە و بە تایبەتی لاوان پێویستە بۆ خاوەندارێتی لە رێبازی شەهید فەرهاد رۆڵێکی چالاکانە بگێرن و روو بکەنە چیاکانی کوردستان و بۆ بەردەوامکردنی رێبازی پیرۆزی ئەو شەهیدە و سەرجەم شەهیدانی کوردستان بەشداری لە ریزەکانی گەریلادا بکەن. PJAKیش وەک پارتییەکی شەهیدان، بەوپەری باوەرییەوە خاوەندارێتی لە هەموو شەهیدانی کوردستان دەکات و بۆ بەردەوامکردنی رێگای ئەوان درێژە بە تێکۆشانی تا سەرکەوتن دەدات.






بژی سەرۆک ئاپۆ
شەهید نامرن
بژی پێشەنگی تێکۆشانی ئازادی گەلەکەمان PJAK
کوردیناسیونی پارتی ژیانی ئازادی کوردستان PJAK
10/10/2007

له‌ هه‌رێمه‌کانی باشوری کوردستان چالاکی شه‌رمه‌زارکردنی کۆمپلۆی 9 ئۆکتۆبه‌ر به‌رده‌وامه‌

له‌ هه‌رێمه‌کانی باشوری کوردستان چالاکی شه‌رمه‌زارکردنی کۆمپلۆی 9 ئۆکتۆبه‌ر به‌رده‌وامه‌

به‌و ئامانجه‌، پارتی چاره‌سه‌ری کوردستان پچدک، له‌ شاری که‌رکوک سیمینارێکیان ڕیکخست.

له‌ سیمیناره‌که‌دا سه‌باح نوری، یه‌کێک له‌ به‌ڕێوه‌به‌رانی پچدک، به‌لێدوانێک تیشکی خسته‌ سه‌ر کۆمپلۆی 9 ئوکتوبه‌ر و به‌م شێوه‌یه‌ دوا: له‌ شه‌خسی ڕێبه‌ری گه‌لی کورد عه‌بدوڵا ئۆجه‌لاندا ده‌یانهه‌وێ ته‌ڤگه‌ری ئازادی گه‌لی کورد له‌ناوبه‌رن.
سه‌باح نوری هه‌روه‌ها بانگی له‌ کوردانی باشوری کوردستان کرد که‌ خاوه‌نداریه‌تی له‌ ئۆجه‌لان بکه‌ن.

نوری هه‌روه‌ها ده‌ستنیشانی کرد که‌ ئه‌گه‌ر به‌ڕێوه‌به‌رانی کورد له‌ باشوری کوردستان له‌دژی ئه‌و هێرشانه‌ی که‌ ده‌کرێنه‌ سه‌ر ئۆجه‌لان و ته‌ڤگه‌ری ئازادی گه‌لی کورد، هه‌ڵوێست نیشان نه‌ده‌ن، ئه‌وکات ده‌ستکه‌وته‌کانی باشوری کوردستانیش ده‌که‌ونه‌ ژێر بارێکی ترسناکه‌وه‌.

سه‌باح نوری هه‌روه‌ها بانگی له‌ کۆمیته‌ی پێشگرتن له‌ ئه‌شکه‌نجه‌ی ئه‌وروپا کرد که‌ ڕاپۆرته‌که‌یان له‌سه‌ر ئیمڕالی ئاشکرا بکه‌ن.